12 Դեկտեմբեր 2023ը մեր աշակերտութեան համար եղաւ հետաքրքրական ու նորարարական, քանի, ատենամարզանքի պահը յատկացուած էր բոլորովին նոր նիւթի մը, անիկա դառնալով վայելքի առիթ մը, ծանօթանալու այլ երկրի մը գոյութեան, իր զանազան երեսներով, գոյներով, կազմութեամբ ու կառուցողականութեամբ և ընդհանրապէս գոյավիճակով:
Խնդրոյ առարկայ երկիրն էր՝ ՔՈԼՈՄՊԻԱՆ, որուն համար հրաւիրուած էր Լիբանանի մօտ Քոլոմպիոյ դեսպանը, նորին վսեմութիւն Տիար Էտուին Օսթոս Ալֆոնսօ, ներկայացնելու իր երկրին մասին շահեկան տեղեկութիւններ ու բացատրութիւններ, տեսաերիզի ցուցադրութեամբ:
Տնօրէնը՝ Պրն. Արա Վասիլեան, յաւուր պատշաճի ծանօթացուց Պրն. դեսպանը, նշելով անոր հանրօգուտ գործունէութիւնը, ապա, անդրադառնալով օրուան նիւթին այժմէականութեան, հուսկ՝ հրաւիրելով հիւրը:
Պրն. դեսպանը, անգլերէնով հաճելի ու հաղորդական լեզուով մը, իր ուրախութիւնը յայտնեց այս յիշատակելի առիթին համար, ապա, կեդրոնացաւ՝ «Քոլոմպիա՝ գեղեցիկ երկիրը» խորագիրին, նկարագրելով երկրին աշխարհագրութիւնը, գեղեցկավայրերը, տեսարժան շրջանները և առ հասարակ այն բարեմասնութիւնները, որոնցմով նշանաւոր է ան:
Խօսեցաւ նաեւ Քոլոմպիացի ժողովուրդի կեանքին ու կենցաղին, ապրելակերպին, զբաղմունքներուն, տնտեսութեան, ընկերային ու մշակութային գործունէութեանց, աւանդութեանց, ներքին և արտաքին յարաբերութեանց, կրթութեան ու գիտութեան զարգացումներուն մասին, որոնք բոլորն ալ մեծ գոհունակութեամբ ընդունուեցան:
Հարցումները բազմաթիւ ու բազմասեռ էին, մանաւանդ երբ աշակերտներէն մէկը հարց տուաւ, եթէ հայկական համայնք կա՞յ հոն, պատասխանը եղաւ որ կայ և հինէն ի վեր հոն կայք հաստատած են հայեր, լաւ և սիրալիր կապեր ունենալով տեղացիներուն հետ:
Այս առիթով, ուրիշ հաճելի անակնկալ մըն էր իտալական «Ֆապրիանօ»ի մրցանակաւորներու տուչութիւնը, զոր վարեց և այդ մասին տեղեկութիւններ փոխանցեց տուեալ կազմակերպութեան ներկայացուցիչը՝ Պրն. Ժան-Քլօտ Նահհասը, իւրաքանչիւրին կոչ ընելով յետագային անպայման մասնակցելու այս օգտաշատ մրցոյթին:
Յիշենք որ՝ մեր աշակերտներէն վեց հոգի ստացաւ իր մրցանակը, ձեռամբ Պրն. դեսպանին, Պրն. Նահհասին և Պրն. Տնօրէնին:
Արժանացող մրցանակակիրներն էին` Մապէլ Արմաղանեանը, Գլառիթա Նազարեանը, Դալար Աշճեանը, Ռայըն Ադամեանն ու Մակտալենա Պալճեանը: Անոնք իրենց արժեքաւոր մրցանակները ստացան ՀԲԸՄի Լիբանանի Կրթական Յանձնխումբի անդամ՝ Տիկ. Սինթիա Մենտիլեանի, նկարչութեան ուսուցչուհի՝ Տիկ. Թամարա Շիր Յակոբեանի, Պրն. Ժան-Քլօտ Նահհասի, Տիար Էտուին Օսթոս Ալֆոնսոյի եւ Պրն. Արա Վասիլեանի ձեռամբ: