Հինգշաբթի 19 Հոկտեմբերին, Հ.Բ.Ը.Մ-Ի Պօղոս Գ. Կարմիրեան վարժարանի աշակերտները գեղարուեստական կոկիկ յայտագիրով մը վերանորոգեցին մայրենի լեզուի հանդէպ իրենց ուխտը:
Բացման խօսքը եւ օրուան խորհուրդը փոխանցելու համար բեմ բարձրացան Է. կարգէն՝ Մէրի Նաճարեանը, Մէյրի Կէպէնլեանը եւ Կայէլ Էլսուէյտին, անոնք իրենց խօսքին ընդմէջէն հակիրճ փոխանեցին օրուան խորհուրդը եւ աւելցուցին ըսելով, թէ հայ ժողովուրդը պատմութեան ընթացքին ունեցած է եւ այսօր ալ ունի երկու նուիրական ու Աստուածապարգեւ սրբութիւններ՝ Հայաստանեաց Առաքելական եկեղեցին եւ կատարելագոյն Այբուբենը հայոց, որոնց ամուր փարած եւ որոնց շնորհիւ ան գոյատեւած է պատմութեան քառուղիներուն մէջ եւ կրնայ շարունակել իր ներկայութիւնը այս աշխարհին վրայ:
Գեղարուեստական յայտագիրին ընդմէջէն Բ. դասարանի աշակերտները արտասանեցին «Հայ դպրոց»ը, Գ. Դասարանի աշակերտները կատարեցին «Հայերէն երգենք» խմբերգը, Դ. կարգի աշակերտները արտասանեցին Սիլվա Կապուտիկեանի՝ «Խօսք իմ որդուն» բանաստեղծութիւնը, Ե. կարգի աշակերտները յատագիրին իրենց մասնակցութիւնը բերին կատարելով «Մայրենի լեզու» խմբերգը, իսկ Զ. կարգի աշակերտները արտասնեցին Մուշեղ Իշխանի՝ «Հայ լեզուն տունն է հայուն» բանաստեղծութիւնը, ապա ցուցադրուեցաւ «Այբուբեն հայոց» խորագիրով տեսաերիզ մը: Յայտագիրի գեղարուեստական բաժինը աւարտեցաւ Ա. կարգի աշակերտներու սքանչելի պարով:
Հուսկ խօսք առաւ վարժարանիս Տնօրէնուհին՝ տիկին Մարալ Պալեօզեանը, որ ըսաւ թէ մենք հպարտ պէտք ըլլանք, որովհետեւ հայ ժողովուրդը սակաւաթիւ այն ժողովուրդներէն է, որ ունի իր սեփական այբուբենը, հետեւաբար իւրաքանչիւր աշակերտ պէտք է սիրէ ու գուրգուրայ մայրենիին, ապա Տիկին Պալեօզեան գնահատեց աշկերտներուն անթերի ներկայացումը եւ շնորհակալութիւն յայտնեց յայտագիրին պատասխանատու ուսուցիչներուն :
Ձեռնարկի աւարտին աշակերտները իրենց հետ տարին տօնը խորհրդանշող ձեռային աշխատանք մը:
