Մարտ ամիսը բեղուն ամիս մը եղաւ Պօղոս Գ. Կարմիրեան վարժարանի աշակերտութեան համար, շաբաթական դրութեամբ տարբեր բնոյթի ատենամարզանքներ կազմակերպեցինք, որոնք կը միտին աշակերտներուն մտային ու հոգեկան զարգացման և կը յայտնաբերեն անոնց ձիրքերն ու տաղանդները:
Արդարեւ Հինգշաբթի, 30 Մարտին երկրորդ կարգի աշակերտներու կազմակերպութեամբ ու մասնակցութեամբ տեղի ունեցաւ «Մեր Գիւղը» խորագիրով ներկայացումը, նախաձեռնութեամբ Տիկին Հէլէն Էլ Ժըմայէլի:
Թատերգութեան դէպքը տեղի կ’ունենայ Լիբանանի Ուատի էլ Քարըմ գիւղին մէջ: Ժատ անունով փոքրիկ մը կ’ուզէ իր ամառնային արձակուրդը անցընել իր մեծ հօր գիւղը: Ճամբան կը հանդիպի խումբ մը մարդոց, որոնք կ’օգնէն իրենց դրացիին և շատ մեծ կ’ըլլայ անոր զարմանքը երբ կ’իմանայ թէ անոնք սիրայօժար և կամաւոր կ’օգնեն առանց վարձատրութեան: Ապա շարունակելով ճամբան կը հանդիպի խումբ մը պատանիներու, որոնք ուրախ կը խնդան, կը հարցնէ պատճառը և անոնք կը պատասխանեն թէ այսօր Սուրբ Ապտայի տօնն է և եկեղեցւոյ բակը զանազան խաղեր կազմակերպած են, և կ’առաջարկեն Ժատին, որ ընկերանայ իրենց, բայց ան կը մերժէ և կ’ուզէ տունը իր համակարգիչով խաղալ: Կէսօրին Ժատը կ’անօթենայ և տուն կ’երթայ ճաշելու, սակայն մեծ մօրը պատրաստած ճաշը չի հաւնիր և կը նախընտրէ փռապանէն խմորեղէն ուտել:
Յաջորդ օրը ճաշարան մը կ’երթայ և բիզա կ’ապսպրէ ու կ’ուտէ, և այսպէս մէկ ամիս շարունակ միայն ճաշարանի ճաշերը կ’ուտէ: Օր մըն ալ երբ տուն կը վերադառնայ ուժասպառ գետին կ’իյնայ:
Անմիջապէս բժիշկը կը կանչեն, որ քննելով հիւանդը կը յայտնէ թէ ան ուտելիքէն թունաւորուած է: Մեծ հայրը կը խրատէ, որ տան պատրաստած ուտելիքները առողջարար են, խուսափինք դուրս վաճառուող ուտելիքներ ուտելէն, բնութեան գիրկը դառնանք, շատ ջուր խմենք և մարզանք ընենք առողջ ապրելու համար:
Թատերգութիւնը ընդմիջուեցաւ հայկական և արաբական պարերով, ինչպէս նաեւ հայերէն և ֆրանսերէն երգերով:
Բ. կարգի աշակերտները իրենց սքանչելի ներկայացումով, երգերով ու պարերով արժանացան ներկաներուն բարձր գնահատանքին: Յայտագրի աւարտին անոնք գիւղէն բերած ծաղիկի թաղարներ նուիրեցին իրենց մայրերուն:
Վարժարանիս Տնօրէնուհին Սիկին Մարալ Պալեօզեան խօսք առնելով գնահատեց աշակերտներուն անթերի ներկայացումը և աւելցուց թէ անոնք այս ներկայացումով կրցան գիւղին կենցաղը, բարքերն ու սովորութիւնները փոխանցել մեզի: Յատուկ շնորհակալութիւն յայտնեց նաեւ յայտագիրը պատրաստող ուսուցչուհիին Տիկին Հէլէն Էլ ժըմայէլին: