Պօղոս Գ. Կարմիրեան վարժարանի Տիկնանց Յանձնախումբը, աւանդութիւն դարձուցած է հիւրասիրութեամբ մը, ամէն տարի նշելու ուսուցչաց տօնը, մեծարելու եւ փառաբանելու համար այն անձնուրաց եւ վեհոգի անձիք, որոնք իրենց կեանքը նուիրած են ու կը շարունակեն նուիրել մատղաշ սերունդի կրթութեան եւ դաստիարակութեան:
Արդ, Երեքշաբթի 7 Մարտին, վարժարանիս տնօրէնութիւնն ու ուսուցչական կազմը հրաւիրուած էին սրահը, ճաշակելու ժրաջան տիկիններու պատրաստած համադամ ճաշերն ու խորտիկները: Հանդիպումը իր աւարտին հասաւ կարկանդակի հատումով: Վարձքը կատար բոլոր ուսուցիչներուն, որոնք կանթեղի պատրոյգին նման վառելով կը լուսաւորեն մատղաշ սերունդներուն մտքերը, պատրաստելով արժանաւոր հայորդիներ:
